У Беларускім дзяржаўным музеі гісторыі Вялікай Айчыннай вайны адбылася прэзентацыя кнігі ўспамінаў «Наследники Победы: 9 мая 1945 года. Дети войны.» /»Нашчадкі Перамогі: 9 мая 1945 года. Дзеці вайны,» напісанай ветэранам Узброеных Сіл СССР, падпалкоўнікам у адстаўцы Ільёй Макаравічам Караблікавым і палкоўнікам у адстаўцы, членам Саюза пісьменнікаў Расіі Мікалаем Зыгмунтавічам Кунцам.
У прэзентацыі прынялі ўдзел прадстаўнікі Міністэрства абароны Беларусі і патрыятычных грамадскіх арганізацый, выхаванцы МСВВ, у тым ліку беларускі грамадскі дзеяч і паралімпіец Аляксей Талай, легенда савецкага футбола Эдуард Малафееў, выкладчыкі і супрацоўнікі БДУФК.
У кнізе, выпушчанай выдавецтвам «Беларусь», распавядаецца пра складаныя лёсы дзяцей, якія ў малалетнім узросце пацярпелі ад лютага фашызму ў гады Вялікай Айчыннай вайны. Яны сталі сведкамі жудасных падзей, многім давялося прайсці праз канцлагеры і турмы гестапа, яўрэйскія гета. На іх долю выпала безліч пакут, але яны выстаялі, выжылі, не пакарыліся. Дзеці вайны не толькі з годнасцю вынеслі ўсе выпрабаванні ваеннага ліхалецця, але і актыўна ўдзельнічалі ў пасляваенным аднаўленні краіны, многае зрабілі для яе росквіту і ўмацавання аўтарытэту на міжнароднай арэне.
«Дзеці вайны сталі дастойнымі нашчадкамі Вялікай Перамогі», — падкрэсліў Ілья Макаравіч Караблікаў. Пачэсна адзначыць, што Беларускі дзяржаўны ўніверсітэт фізічнай культуры таксама ўнёс свой уклад у працу над выданнем. Студэнты факультэтаў менеджменту, спорту, турызму і гасціннасці і аздараўленчай фізічнай культуры пад кіраўніцтвам старшага выкладчыка кафедры беларускай і рускай моў Каламійцавай Веранікі Аляксандраўны прынялі ўдзел у падрыхтоўцы матэрыялаў да главы «Дзеці вайны — прызёры Алімпійскіх гульняў». У кнігу ўвайшлі славутыя імёны: Мядзведзя А.В, Малафеева Э.В., Ачкінай Р.М., Крываносава М.П., Гейштара Л.Р., Валчэцкай А.У., Караваева А.М., Пархімовіча В.М. і інш. У главе «Дзеці вайны — прызёры Алімпійскіх гульняў» асветлены старонкі іх складанага ваеннага жыцця, тытанічнай працы над сабой і, вядома, перамогі нашых славутых спартсменаў, прыведзены біяграфічныя даведкі.
У сваім выступленні Аляксей Канстанцінавіч Талай, рэкардсмен Еўропы і свету па паралімпійскім плаванні, адзначыў: «Праз кнігу мы знаёмімся з нашымі пераможцамі нават з тымі, чые імёны не так вядомыя, як яны гэтага заслужылі. Мы дакранаемся да іх шляху, мэтанакіраванасці, перамогі. І самі ад гэтага становімся мацнейшымі, больш матываванымі і мэтанакіраванымі. Дадзеная кніга будзе карысная маладым спартсменам і ўсім, хто ў сілу розных жыццёвых абставінаў страціў арыенцір і вырашыў, што не зможа. Немагчымае-магчыма! Сіла духу-вось пра што гэтая кніга!»
Місія кнігі «Нашчадкі Перамогі: 9 мая 1945 года. «Дзеці вайны» — ушанаванне памяці сапраўдных герояў, перадача наступным пакаленням узору стойкасці і мужнасці, моцы і сілы, чалавечнасці, духоўнасці і выскародства на карысць мірнага жыцця роднай краіны і ўсяго чалавецтва.
