Дзеля захавання моў, якія апынуліся на парозе знікнення, у лістападзе 1999 года ЮНЕСКА абвясціла з 2000 года 21 лютага адзначаць ва ўсім свеце Міжнародны дзень роднай мовы.

На кафедры беларускай і рускай моў факультэта аздараўленчай фізічнай культуры адбылася літаратурна-музычная гасцёўня «Якая цудоўная родная мова!”, прысвечаная Міжнароднаму дню роднай мовы.

Мерапрыемства накіравана на папулярызацыю роднай мовы ў студэнцкім асяроддзі, знаёмства з беларускай паэтычна-музычнай спадчынай, далучэнне моладзі да культурных традыцый, захаванне духоўнага здабытку.

Вяла творчую сустрэчу Вераніка Аляксандраўна Каламійцава, старшы выкладчык кафедры беларускай і рускай моў, якая на працягу літаратурна-музычнай гасцёўні імкнулася данесці слухачам пра значнасць беларускай мовы, яе веліч і прыгажосць.

У Міжнародны дзень роднай мовы ў госці да супрацоўнікаў і студэнтаў БДУФК завіталі Ірына Тулупава — сябра Саюза пісьменнікаў Беларусі, Віктар Мяцельскі — спявак, кампазітар, сябра беларускага саюза музычных дзеячаў.

Як вядома, беларуская мова вельмі шырока адлюстравана ў мастацкіх творах, як у паэзіі, так і ў прозе. Урачыста, натхнёна і заўзята гучала яна ў гэты дзень.

Віктар Мяцельскі пранікнёна выканаў песні на словы Янкі Купалы, прагучалі таксама песні на словы сучасных аўтараў: Міхася Пазнякова «Заўжды вярнуся», Алены Басікірскай «Мая зямля», Федара Баравога “Родная старонка”. Ірына Тулупава прачытала вершы, прысвечаныя класікам беларускай літаратуры. Паэтэса пазнаёміла ўсіх прысутных са сваёй духоўнай паэзіяй, шчырай і ўзнёслай. Яе непаўторныя вершы з кнігі лірыкі “Шукаю і знаходжу” выклікалі жывы інтарэс і разнастайную палітру пачуццяў у аўдыторыі.

Цудоўна выступілі  студэнты 424 групы, якія не толькі слухалі, але і чыталі ўлюбёныя вершы, спявалі пад акампанемент баяна, узяўшы непасрэдны ўдзел у інтэрактыўнай імпрэзе.

Супрацоўнікі навуковай бібліятэкі БДУФК падрыхтавалі цікавую тэматычную выставу да Міжнароднага дня роднай мовы.

Дзякуючы мерапрыемству, прысвечанаму Міжнароднаму дню роднай мовы, яго ўдзельнікі больш глыбока спасціглі беларускую мову і народную культуру, якія дайшлі да сучаснікаў з глыбіні стагоддзяў.

Літаратурна-музычная гасцёўня «Якая цудоўная родная мова!”,  прысвечаная Міжнароднаму дню роднай мовы, стала цудоўным стартам шэрагу мерапрыемстваў, якія адбыліся на факультэце  аздараўленчай фізічнай культуры на працягу вучэбнага тыдня.